चलचित्र सेन्सर बोर्डले नाङ्गो दृश्यमा कडाई गर्न थालेपछि अहिले निर्माताहरु समस्यामा परेका छन् । नायिकाको भित्री बस्त्र देखिएको दृश्य देखि चुम्बन सम्म सेन्सरको आखामा परेको छ ।यही समस्या झेल्यो, भदौ २८ गतेबाट प्रदर्शनमा आउन लागेको चलचित्र ‘राजनीति’ले । चलचित्रमा समावेश ‘मैले आखा झिम्क्याउदा पानी पर्छ भन्छन्’ बोलको आइटम गीतलाई सेन्सरले आपत्ती जनायो । गीतमा नाच्ने क्रममा नायिका सुष्मा कार्कीको भित्री बस्त्र देखिएको भन्दै सेन्सरले आपत्ती जनाएको हो ।

तर चलचित्रलाई सेन्सर बोर्डले पीजी सर्टिफिकेट दिएको छ । अब यो चलचित्र हेर्नका लागि १६ बर्ष भन्दा तलका बालबालिकाले बाबुआमालाई सँगै लैजानु पर्ने हुन्छ ।बसन्त निरौलाको निर्देशनमा तयार भएको यो चलचित्रमा दिपक सुवेदीको लगानी छ । चलचित्रमा राजेश हमाल, कोमल वली, पवित्रा आचार्य, दिपक सुवेदी, रमेश बुढाथोकी लगायतका कलाकारको अभिनय छ । चलचित्रले नेपालको बर्तमान अस्तव्यस्त राजनीतिक अवस्थालाई देखाउन खोजेको छ । चलचित्रमा समावेश राष्ट्रियताको भाव बोकेका एक गीत अहिले सर्वाधिक चर्चामा छ ।

तीज पर्व बल्ल नेपालीहरुको घरमा भित्रिएको छ । तर तीजको गीतमा नाच्ने मोडल तथा गाउने गायक गायिकालाई भने २ महिना अघि देखि नै तीज लागेको थियो । यो भिडमा लोकगीतको म्यूजिक भिडियोमा रानीको रुपमा उदाएकी पार्वती राई सर्वाधिक व्यस्त बनिन् ।उनले यो बर्ष निर्माण भएका १ सय भन्दा बढि गीतमध्ये २८ वटा गीतको भिडियोमा नृत्य गर्न भ्याइन् । केही समय अघि सम्म तीज र दोहोरी गीतको भिडियोमा संझना वुढाथोकीको बर्चस्व थियो । तर केही बर्ष यता पार्वतीले यो उपाधी खोसेकी छिन् । एउटा भिडियोमा काम गरेको कती लिनुहुन्छ त भन्ने अनलाइनखबरको प्रश्नमा उनले भनिन्, १० देखि १५ हजार सम्म लिन्छु ।

पार्वतीले आफ्नो नृत्यकला र काम प्रतिको इमान्दारिताले दर्शकहरुले रुचाउनु भएको तर्क गरिन् । तीजको गीतमा नृत्य गर्दा गर्दै थाकेकी उनले केही दिनमै दोहोरी गीतको भिडियोमा अभिनय गर्ने तयारी गरेको जानकारी गराइन् ।

भिडियो क्विन पार्वतीले शंकर वीसी, कपिल लामा, प्रकाश भट्ट जस्ता दोहोरीमा जमेका निर्देशकसँग काम गरेकी छिन् । उनले कस्तुरी शर्मा, रामजी खाँड, टिका पुन, राधिका हमाल, पूर्णकला वीसी जस्ता चर्चित गायक तथा गायिकाको आवाजमा समावेश तीजको गीतमा अभिनय गरेको बताइन् ।