१६ माघ, काभ्रे । एकीकृत नेकपा माओवादीका अध्यक्ष पुष्पकमल दाहाल प्रचण्डले सरकारविरुद्ध आन्दोलनरत विपक्षी कांग्रेस-एमालेलाई ‘आतंककारी’को संज्ञा दिनु भएको छ ।
पार्टीको काभ्रे जिल्ला सम्मेलन उद्घाटन गर्दै प्रचण्डले आफ्नो पार्टीको शान्तिपूर्ण सभामा ढुंगामुढा गर्ने कांग्रेस-एमाले आतंककारी भएको बताउनुभयो । २/४ जनालाई ढुंगा हान्न लगाउँदैमा कांग्रेस-एमालेलाई सत्ता नदिने उहाँको भनाई थियो ।
एमाओवादी अध्यक्ष प्रचण्डले अब १० वर्षसम्म कांग्रेस एमालेले सरकार नपाउने दावी गर्नुभयो । जनताको विश्वासमा माओवादीमै रहेको भन्दै उहाँले १० वर्षसम्म आफूहरु असफल भएमा मात्र कांग्रेस-एमालेको पालो आउने उहाँको भनाई छ । उहाँले भन्नुभयो-’हामी सफल भयौं भने जनताको साथ लिएर वर्षौ सरकार चलाउँछौं ।’
चार दोबाटोमा भएको अधिवेशनमा सहभागी हुन जाने क्रममा प्रचण्डसहित प्रधानमन्त्री डा. बाबुराम भट्टराई र उपप्रधानमन्त्री नारायणकाजी श्रेष्ठ प्रकाशलाई विपक्षी कार्यकर्ताले कालोझण्डा देखाएका थिए । त्यसक्रममा वाईसीएल कार्यकर्ता र प्रदर्शनकारीबीच झडप हुँदा केहीबेर तीन दोबोटो क्षेत्र तनावग्रस्त बनेको थियो ।
