काठमाडौं, साउन २० - भदौमा हुने साफ च्याम्पियनशिप फुटबलको अभ्यासका लागि नेपाली टोली बहराईन गएको छ । टोलीलाई अखिल नेपाल फुटबल संघ एन्फाले दशरथ रंगशालामा एक कार्यक्रम गरी बिदाई गरेको छ ।

टोलीलाई विदाई गर्दै अखिल नेपाल फुटबल संघ एन्फाका अध्यक्ष गणेश थापाले साफ च्याम्पियनशिपमा नेपाल बलियो हुँदा हुँदै भाग्यले साथ नदिएका कारण उपाधि जित्न नसकेको बताए । उनले यो पटक नेपालले घरेलु मैदानमा उपाधि जित्ने भन्दै तयारी राम्रो गर्न खेलाडीहरुलाई सुझाव दिए ।

यस्तै टोलीलाई विदाई गर्दै राष्ट्रिय खेलकुद परिषदका सदस्य सचिव युवराज लामाले अहिले उपाधि जित्ने सही समय आएको बताए ।

नेपाली टोली बहराईन र कुवेतमा प्रशिक्षणपछि भदौ ९ गते स्वदेश फर्किने अखिल नेपाल फूटबल संघ एन्फाले जनाएको छ । भदौ १६ गतेदेखि काठमाडौंमा हुने साफ च्याम्पियनसीपमा नेपाल सहित भारत, भुटान, अफगानिस्तान, मालदिभ्स, पाकिस्तान, बंगलादेश र श्रीलंकाले भाग लिनेछन् ।