World News Siriya News

मस्को, १९ भदौ । रसियाली राष्ट्रपति भ्लादिमिर पुटिनले बुधबार रसियाले सिरियालाई जटिल एस–३०० क्षेप्यास्त्र प्रणालीका केही भाग पहिलेनै हस्तान्तरण गरिसकेपनि यस हतियार प्रणालीको सम्पूर्ण भाग हस्तान्तरण गर्ने कार्य स्थगन गरेको बताउनुभएको छ । पश्चिमी सरकारले सिरियाली राष्ट्रपति बसार अल–असादको सरकारलाई एस–३०० नामक हवाइ प्रतिरक्षा प्रणाली हस्तान्तरण गर्ने सम्झौतामा हस्ताक्षर गरेकोमा पटकपटक भत्र्सना गरेका छन् । यो हतियार प्रणाली रसियाको सबैभन्दा मन पराइएको सैनिक निकासीको भाग बनेको छ ।

रसियाले पटकपटक यो करार कार्यान्वयन हुने जानकारी दिएको थियो भने च्यानल वन नामक राज्यद्वारा सञ्चालित टेलिभिजनमा बोल्दै राष्ट्रपति पुटिनले यसको आपूर्ति हाल स्थगन गरिएको बताउनुभयो । उहाँले यस विषयमा थप जानकारी दिनुभएन । उहाँले रसियाले छुट्टै भाग हस्तान्तरण गरेको तर सम्पूर्ण प्रणाली हस्तान्तरण भइनसकेको र हाल यस्तो कार्य स्थगन गरिएको बताउनुभयो ।

जुन महिनामा पनि राष्ट्रपति पुटिनले उक्त करार कार्यान्वयन नभएको बताउँदै मस्कोले यस क्षेत्रमा सन्तुलन खल्बलाउन नचाहेको बताउनुभयो । पश्चिमी मुलुक तथा इजरायलले मस्कोले यो जटिल हतियार सिरियालाई उपलब्ध गराए दमासकसमाथि हुने हवाइ आक्रमणको प्रतिक्रिया दिने शक्तिशाली हतियार उपलब्ध हुने दाबी गरेका छन् ।राष्ट्रपति पुटिनले एस–३०० प्रणाली रसियाको सबैभन्दा आधुनिक हतियार मात्र नभएको बताउँदै यो अमेरिकी प्याट्रियोट क्षेप्यास्त्रभन्दा केही राम्रो भएको बताउनुभयो । एस–३०० नामक जमिनबाट आकाशमा प्रहार गरिने क्षेप्यास्त्र पहिलोपटक सोभियत सङ्घमा विकास भएको हो र सङ्घ पतन भएपछि पनि यसका नयाँ संस्करणहरु विकास भएका छन् ।

रसियाली आमसञ्चारले दमासकसले तीन देखि छवटा यस्तो क्षेप्यास्त्र प्रणालीका लागि एक अर्ब अमेरिकी डलर बराबरको करार गरेको जानकारी दिएका छन् । यसअघि रसियाले इरानलाई करिब ८० करोड अमेरिकी डलर बराबरको एस–३०० क्षेप्यास्त्र उपलब्ध गराउने करार स्थगन गरेको थियो । यसका लागि अमेरिका तथा इजरायलले निकै दबाब दिएको बताइएको छ ।