नेपाली राष्ट्रिय फुटबल टिमले साफ च्याम्पियनसिपको तयारीमा तीन साता लामो बहराइन र कुवेत भ्रमणबाट फर्केपछि सेनाको भद्रकालीस्थित जंगी अड्डाको मैदानमा सोमबार प्रशिक्षण सुरु गरेको छ । गत वर्ष पुसको मध्यमा त्रिभुवन विमानस्थल ओर्लंदै अमेरिकी प्रशिक्षक ज्याक स्टेफनोस्कीले नेपाललाई दक्षिण एसियाकै नम्बर एक बनाउने योजना सुनाएका थिए । नेपाल साँच्चिकै साफ च्याम्पियन बन्ला ? गल्फ क्षेत्रमा गरेको तयारी र नेपालको सम्भावनाबारे स्टेफनोस्कीसँग गरिएको कुराकानी :

साफको तयारीमा तीन साता गल्फ यात्रा कस्तो रह्यो ?

त्यहाँको तयारी धेरै राम्रो भयो । अभ्यासका केही खेलमा धेरै राम्रो गर्‍यौं । त्यसैले पछिल्ला २१ दिन टिमले गरेको तयारीमा धेरै खुसी छौं ।

गल्फको अभ्यासपछि टिममा के परिवर्तन आएको छ ?

परिवर्तनका निम्ति निरन्तर लामो समय काम गर्नुपर्छ । यस्तो अवसरबारे मैले अगाडि नै विचार गरिसकेको थिएँ । त्यसैले केही दिनयता प्रगति गरेका छौं । त्यो परिवर्तन राम्रो र हेर्नलायक छ ।

साफ च्याम्पियनसिपका लागि तयार भइसकेको अवस्था हो ?

हो, केटाहरू (खेलाडी) ले सहज महसुस गरेका छन् । हामीले पनि । र, तयारी लगभग पूरा भइसकेको छ । अब हाम्रो ध्यान प्रतियोगितामै केन्दि्रत भएको छ ।

नेपालको बलियो पक्ष के हो ?

हामीले एक टिमका रूपमा अभ्यासमा राम्रो खेल्यौं । यो नै राम्रो पक्ष हो । टिममा एकदमै राम्रो एकता छ । यो सबैभन्दा बलियो पक्ष हो ।

गल्फ यात्रामा भिन्न के सिक्ने मौका मिल्यो ?

सबैभन्दा महत्त्वपूर्ण विषय सही समयमा अहिले टिमले राम्रो खेलिरहेको छ । रक्षात्मक, आक्रामकसहित सबै क्षेत्रमा टिमले उच्चस्तरको खेल पस्किरहेको छ ।

नेपालले खेलेका ५ अभ्यास खेलमा प्रतिद्वन्द्वी कस्ता थिए ?

प्रतिद्वन्द्वीहरू राम्रा थिए । चुनौतीपूर्ण पनि । बहराइन यू-२३ र इस्ट रिफा -बहराइनी क्लब) बलिया थिए । प्रत्येक खेलमा हामीले प्रभाव जमाएका थियौं ।

घरेलु दर्शक र मैदानमा खेल्न कत्तिको दबाब पर्ला ?

कुनै दबाब छैन । किनभने सही समयमा अहिले खेलाडीले राम्रो खेलिरहेका छन् । उस्तै प्रदर्शन साफमा पनि गर्छन् भन्ने मैले आस गरेको छु ।

नेपालकै समूहमा डिफेन्डिङ च्याम्पियन भारत, सन् २००३ को विजेता बंगलादेश र पाकिस्तान छन् । उनीहरूबारे कस्तो मूल्यांकन गरिएको छ ?

सबै प्रतिद्वन्द्वी धेरै राम्रा छन् । सबै खेल प्रतिस्पर्धात्मक हुनेछन् । मैले टिम सम्हालेयता पाकिस्तान र बंगलादेशविरुद्ध खेलिसकेका छौं । त्यसैले उनीहरूबारे राम्रो ज्ञान छ । भारत च्याम्पियन भइसकेको टिम हो ।

नेपाली टिमको घोषणा कहिले हुन्छ ?

अहिले २५ खेलाडी छन् । अन्तिम सूचीमा २० खेलाडीसहितको टिम बुधबार घोषणा हुनेछ ।

सबै खेलाडी स्वस्थ छन् ?

दुई खेलाडी (जगजित श्रेष्ठ र रविन श्रेष्ठ) घाइते छन् । तर, उनीहरूको समस्या सामन्य हो । उनीहरूलाई पूर्णरूपमा स्वस्थ हुन धेरै समय लाग्दैन ।

अन्तर्राष्ट्रिय खेलमा गोल गर्न नसक्ने नेपालको परम्परागत कमजोरी कसरी हट्ला ?

हामी गोल गर्न सक्छौं भन्ने तीन सातायता प्रमाणित गर्‍यौं ।

साफमा त्यसले निरन्तरता पाउँछ भन्ने आस छ ।

नेपालको साफ च्याम्पियन बन्ने सपना साकार होला ?

हुन्छ, हामीले उपाधि जित्ने सम्भावना छ । तयारीको पहिलो दिनदेखि नै हामी उपाधि जित्नेमा केन्दि्रत छौं । पछिल्ला तीन साताको राम्रो अनुभवले पनि च्याम्पियन बन्नेमा विश्वस्त बनाएको छ ।

नेपाललाई यथार्थमै च्याम्पियन हुने मौका छ ?

छ, हामी साफमा पहिलो हुन सक्छौं । हाम्रो निशाना पनि त्यही (च्याम्पियन बन्ने) हो ।