Nasa In Nepali

शुक्रबार २१ भाद्र, २०७०


एन्मा र नासाको सम्मेलनमा ८ सय नेपाली सहभागी
साउथ क्यारोलीना— अमेरिकमा रहेका नेपालीहरुका दुई ठूला संस्थाहरु एशोसिएसन अफ नेप्लीज इन मिडवेष्ट अमेरिका (एन्मा) र २२ बर्ष पहिले स्थापना भएको नेप्लिज एशोसिएसन इन साउथइस्ट अमेरिका (नासा)को ९ औं संयुक्त सम्मेलन भब्यताका साथ सम्पन्न भएको छ। साउथ क्यारोलीनाको स्पार्टनबर्गमा तीन दिनसम्म चलेको संयुक्त सम्मेलनमा अमेरिकामा रहेका आठ सय भन्दा धेरै नेपालीहरुको सहभागितामा थियो।

अमेरिकाको लागि नेपाली राजदुत शंकरप्रसाद शर्माको प्रमुख आतिथ्यमा सम्पन्न भएको सम्मेलनमा रक्तदान, खेलकुद, ट्यालेण्ट शो, बालबालिकाहरुका बिबिध कार्यक्रमहरु, सांस्कृतीक कार्यक्रम, भ्रष्ट्राचारबिरुद्धको अभियानको बारेमा छलफल, ब्यवसायिक विकासको बारेमा छलफल भएको थियो।

३३ वर्ष पहिले स्थापना भएको एशोसिएसन अफ नेप्लिज इन मिडवेष्ट अमेरिका (एन्मा) र २२ बर्ष पहिले स्थापना भएको नेप्लीज एशोसिएसन इन साउथइस्ट अमेरिका (नासा) ले नौ वर्षदेखि संयुक्त रुपमा सम्मेलनको आयोजना गर्दै आएका छन् । हरेक वर्षको अमेरिकन लेबर डेको सन्दर्भ पारेर आयोजना गरिने कार्यक्रम नासा र एन्माले पालैपाले सम्मेलनको सञ्योजन गर्दछन्।

यस वर्ष नासाको अगुवाईमा साउथ क्यारोलिनामा बस्ने नेपालीहरुको संस्था स्क्यानको आयोजनामा सम्पन्न भएको हो। सम्मेलन आयोजक संस्था स्क्यानका अध्यक्ष मनिष शाक्यकाअनुसार आफूहरुले सोचे भन्दा धेरैको संख्यामा उपस्थिती भएकोले कार्यक्रमको ब्यवस्थापन गर्न केही कठिन भए पनि सम्मेलन ऐतिहासीक भएकोमा खुशी व्यक्त गरे।

नासाका निर्बतमान अध्यक्ष सञ्जीव सापकोटाले नासा र एन्माको संयुक्त सम्मेलनमा धेरै नेपालीको सहभागिता निकै उदाहरणीय भएको बताए। १६० भन्दा धेरै खेलाडिको सहभागिता रहेको सम्मेलनमा नेपाल सेन्टर अफ नर्थ क्यारोलीना (एनएनसी) टिम ए भलिबलमा बिजयी भएको थियो भने फुटबलमा फ्लोरिडा चौतारी प्रथम भएको थियो।

यस पटकको सम्मेलनमा नासाले नयाँ नेतृत्वको समेत चयन गरेको छ। दुई बर्षका लागि चयन गरिने नयाँ कार्यसमितीमा साउथ क्यारोलीनामा बस्दै आएका रामचन्द्र बरालको नेतृत्वमा २१ सदस्यीय नयाँ कार्यसमिति चयन गरिएको छ। समितिका अधिकाशं पदहरु सहमतीमै चयन भए पनि बरिष्ठ उपाध्यक्ष, उपाध्यक्ष र सह सचिव पदका लागि भने निर्बाचन भएको थियो। आइतबार भएको निर्बाचनमा बरिष्ठ उपाध्यक्षमा फ्लोरिडाका बिमल नेपाल बिजयी भए। उपाध्यक्षमा जर्जियाका शैलेन्द्र ब्रजाचार्य र सह सचिबमा जर्जियाकै अम्बीका लोहनी शर्मा बिजयी भए। ३ दिनसम्म चलेको सम्मेलनमा विभिन्न क्षेत्रका उत्कृष्ट ब्यक्तिसरुलाई विविध शिर्षकमा सम्मान समेत गरिएको थियो। सम्मेलनको दोस्रो र तेस्रो दिन नासाका पूर्व अध्यक्ष राजा घले र कैलास कायस्थको संयोजनमा भएको विशेष सांस्कृतिक कार्यक्रममा वरिष्ठ कलाकारहरु मीरा राणा, ओम बिक्रम बिष्ट, प्रेम राजा महत, यज्ञमान शाक्य, जगदिश समाल लगायत स्थानीय कलकारहरुले प्रस्तुती दिएका थिए।

सम्मेलनको अन्तीम दिन आगामी बर्ष एन्माको संयोजनमा हुन लागेको दशौं संयुक्त सम्मेलन क्लोराडोमा हुन लागेको जानकारी दिइएको थियो। एन्माका अध्यक्ष गोपेन्द्र भट्टराइका अनुसार क्लोराडोमा हुन लागेको दशौं संयुक्त सम्मेलनको क्लोराडोमा रहेका नेपालीहरुको संस्था रक्की माउण्टेन फ्रेण्स अफ नेपाल र नेपाली घरको संयुक्त आयोजनमा हुनेछ।