International News Egipt
Kairo,काइरो, १८ भदौ । इजिप्टको काइरोस्थित एक अदालतले मङ्गलबार अल–जजिरा इजिप्ट तथा इस्लामिस्ट मुस्लिम ब्रदरहुडको अहरार २५ नामक टेलिभिजनका साथै चार टेलिभिजनलाई बन्द गर्न आदेश दिएको छ । यसरी बन्द हुने अन्य टेलिभिजन च्यानल अल–यार्मुक तथा अल–कद्ससँग नजिकमा रहेको अदालतले दिएको आदेशमा उल्लेख गरिएको छ ।

इस्लामी प्रसारक अल–हफेजलाई क्रिस्चियन समुदायविरुद्ध घृणा फैलाएको र राष्ट्रिय एकतालाई कमजोर पारेको आरोपमा बन्द गर्न एक दिन आगाडि आदेश दिइएको थियो । सेनाले पूर्व राष्ट्रपति मोहमद मोर्सीलाई जुलाई ३ मा अपदस्थ गरेपछि बन्द भएका अन्य इस्लामी नेटवर्कमा अहरार २५ पनि परेको छ ।

इजिप्टका अधिकारीहरूले दोहामा केन्द्रीय कार्यालय रहेको अल–जजिरा मुबासेर मिस्रका लागि काम गर्ने दुइ विदेशी पत्रकारहरूलाई दुई दिन अगाडि फिर्ता पठाएपछि मङगलबार यस च्यानललाई बन्द गर्न आदेश दिइएको छ । इजिप्टका अधिकारीहरूले अल–जजिरा मुबासेर मिस्रले पूर्व राष्ट्रपति मोर्सीलाई अपदस्थ गरिएका विषयमा समाचार दिँदा एकपक्षीय समाचार दिएको आरोप लगाएका छन् ।

यस अघि यस च्यानलले सुरक्षा सेनाले काइरोस्थित आफ्नो कार्यालयमा छापा मारी उपकरणहरू जफत गरेको आरोप लगाएको थियो । यसबीच काइरोबाट प्राप्त अर्को समाचारमा इजिप्टको सैनिक हेलिकप्टरहरूले सिनाइ प्रायःद्वीपमा बिहीबार गरेको व्यापक हवाइ आक्रमणका कारण आठ लडाकूको मृत्यु भएको तथा अन्य १५ घाइते भएको जानकारी सुरक्षा स्रोतले दिएको उल्लिखित छ । उक्त क्षेत्रमा सेना अर्धविद्रोही समूहसँग युद्धरत छ ।

गाजापट्टी पारी राफाहमा उक्त आक्रमण भएको बताइएको छ । प्यालेस्टाइनी क्षेत्र नजिकै रहेको क्षेत्रलाई लडाकूहरूले आफ्नो लुक्ने क्षेत्र बनाएको र सोही क्षेत्रमा आक्रमण भएको बताइएको छ । राष्ट्रपति मोर्सीलाई सेनाले अपदस्थ गरेपछि यस क्षेत्रमा लडाकू तथा सुरक्षा सेनाबीच पटकपटक भिडन्त भएका छन् ।

प्रत्यक्षदर्शीले सेनाको हेलिकप्टरले लडाकू लुकेर रहेको अनेकौँ घरमा आक्रमण गरेको त्यसबाट छ घर नष्ट भएको बताएका छन् । उनीहरूले कम्तीमा चार हेलिकप्टर यस आक्रमणमा प्रयोग भएको र १५ बम खसाइएको बताएका छन् । सेनाले लडाकूको हतियार केन्द्रलाई लक्ष्य बनाइएको जानकारी दिएको छ । लडाकूहरूले पनि सिनाइमा दैनिक रूपमा प्रहरी तथा सैनिक केन्द्रमा आक्रमण गरिरहेका छन् ।