काठमाडौ, श्रावण ७ - नेपालले सेमिफाइनल यात्रा तय गर्ने लक्ष्यसहित अफगानिस्तानविरुद्ध साफ यू-१६ च्याम्पियनसिपको दोस्रो खेल सोमबार खेल्दै छ । पहिलो खेलमा भुटानलाई ७-० ले पन्छाएको नेपालले अफगानिस्तानविरुद्ध जित हात पार्नसके अन्तिम चार प्रवेश निश्चित गर्नेछ ।

समूह 'ए' मा शनिबारै भएको डिफेन्डिङ च्याम्पियन पाकिस्तान र अफगानिस्तानको खेल गोलरहित बराबरीमा टुंगिएको थियो । त्यसैले अफगानिस्तानविरुद्ध ३ अंक जोड्न सके नेपालले एक खेलअगावै सेमिफाइनलमा स्थान सुरक्षित गर्नेछ । तर, अफगानिस्तान सहज प्रतिद्वन्द्वी हुने छैन । 'टेक्निक, ट्याक्टिस र शारीरिक रूपमा अफगानिस्तानी खेलाडी राम्रा छन्,' नेपालका प्रशिक्षक बालगोपाल महर्जनले भने, 'त्यसैले डिफेन्समा सचेत भएर खेल्नेछौं ।' शारीरिक रूपमा निकै कमजोर भुटानविरुद्ध नेपालले डिफेन्समा खासै मिहिनेत गर्नुपरेको थिएन ।

नेपाली टिम भुटानविरुद्ध गोलका निम्ति एकदमै हतारिएको थियो । यस्तोमा उसले दर्शक लोभ्याउने खेल पस्कन सकेन । त्यसैले दशरथ रंगशालामा आत्मविश्वासी ढंगले प्रस्तुत हुँदै खेल शैली राम्रो बनाएर गोलका अवसर सिर्जना गर्नेमा जोड दिने प्रशिक्षक महर्जनले बताए । 'भुटानविरुद्ध विशेषगरी पहिलो हाफमा केही खेलाडी व्यक्तिगत -स्वार्थी) मा केन्दि्रत भए । त्यो गल्ती अफगानिस्तानविरुद्ध गर्ने छैनौं । टिम-वर्कमै खेल्न निर्देशन दिनेछु,' उनले भने ।

अफगानिस्तानविरुद्ध जित हात पार्ने तयारी गरेको उल्लेख गर्दै महर्जनले भने, 'जित हात पार्नसके सेमिफाइनल यात्रा तय गर्दै समूहविजेता बन्ने अवसर हुनेछ ।' केही खेलाडी घाइते भएको पनि उनले बताए । यस्तोमा पहिलो रोजाइको मिडफिल्डमा २-३ खेलाडी परिवर्तन गर्ने उनले बताए । समूहको अर्को खेलमा पाकिस्तानले भुटानविरुद्ध लगनखेलस्थित आर्मी मैदानमा सोमबारै खेल्नेछ ।

भारत ४-१ श्रीलंका

दुई वर्षअघिको उपविजेता भारतले श्रीलंकालाई ४-१ ले हराएर दोस्रो संस्करणको यात्रा आइतबार सुरु गरेको छ । योसँगै उसले तीन देश सम्मिलित समूह 'बी' बाट सेमिफाइनल प्रवेशको सम्भावना बलियो बनायो । आर्मी मैदान, लगनखेलमा प्राप्त भारतको जितमा वेदेश्वर सिंहले दुई गोल गरे । कप्तान कृष्ण पण्डित र प्रोसेनजित चक्रवर्तीले पनि एक-एक गोल गरे । श्रीलंकाको सान्त्वना गोल एसएस निरेशको नाममा रह्यो ।